“Yaşıl Qatar” qrup sərgisi

Məkan: Dəmir Yolu Muzeyi, Bakı, Azərbaycan
Tarix: 25 sentyabr – 25 oktyabr 2025
Kuratorlar: Sitara İbrahimbeili və Ayna Moazzen

Layihə meneceri: Tanzila Bağırova (VarYox komandası)

Dəmir yolu nəqliyyatı ən ekoloji təhlükəsiz nəqliyyat növlərindən biridir. Onun enerji səmərəliliyi dəmir yollarını yaşıl gələcəyin logistikasında mühüm elementə çevirir. Lakin qatarla səyahət yalnız bir nöqtədən digərinə hərəkət demək deyil; bu həm də dəyişən mənzərələri izləmək, müxtəlif insanlarla qarşılaşmaq və həyatın hərəkətini hiss etmək imkanıdır.

Layihənin sənətçilərini birləşdirən əsas məqam ondan ibarətdir ki, onlar Abşeron yarımadasının qonşu qəsəbələrində yaşayırlar və onların gündəlik nəqliyyat vasitəsi Bakı–Pirşağı istiqamətində hərəkət edən elektrik qatarıdır. Onları həmçinin qatarın pəncərəsindən görünən mənzərələrə maraq birləşdirir — bu mənzərələrdə çoxsaylı obyektlər və onların hekayələri gizlənir.
Belə obyektlərdən biri XIX əsrə aid, Pirşağı qəsəbəsində dənizin yaxınlığında yerləşən və tarix və mədəniyyət abidəsi sayılan “Qum Hamamı”dır.

Tamira İbrahimovanın “Xatirələr yolu” adlı video-artında bu gün ilə uşaqlıq xatirələri sakit şəkildə bir-birinə qarışır. Qədim hamam — onun uşaqlıqda tez-tez yanından keçdiyi bir məkan — bədən yaddaşının oyandığı və zamanın xətti axınının itirildiyi bir dönüş nöqtəsinə çevrilir.

Nigar Safarovanın “Qumun nəfəsi” adlı animasiyası vaxtilə yalnız şamın istiliyi ilə qızdırıldığı deyilən Qum Hamamı haqqında rəvayəti vizuallaşdırır. Qum işığa çevrilərkən və işıq mum kimi əridikcə, bu əsər irsimizin nə qədər kövrək və yox olmaq həddində olduğunu vurğulayır.

Elnur Babayevin “Köhnə Hamam” adlı videosu müəllifin 30 ildən artıq əvvəl atası — Azərbaycanın Xalq rəssamı Rasim Babayev ilə birlikdə etdiyi səfər zamanı çəkilmiş sənədli kadrlardan ibarətdir. Bu kadrlar Qum Hamamının — qorunub qalmış, lakin sürətlə dağılan memarlıq abidəsinin — bərpadan əvvəlki vəziyyətini göstərir.

Sәbinә Şixlinskaya isə “Déjà vu” adlı video-artında xatirələrində 1999-cu ildə Qum Hamamına həsr olunmuş və Labirint rəssamlar qrupunun üzvləri ilə birlikdə iştirak etdiyi bədii aksiyaya qayıdır. Bu gün o, həmin performansı davam etdirərək onu yenidən Abşeron memarlığının bu unikal abidəsinə həsr edir.