Lokasiya: Marx Halle, Vyana, AT

Tarix: 27-31.05.2026

Sәnәt Meneceri: Aqnessa Tariverdiyeva

Təqdimatda Atesh Hub rəssamları Jalə Əziz, Emin Mathers və Fidan Nazimqızının, həmçinin Fluxus Space tərəfindən təmsil olunan rəssamlar Elnara Nəsirli, Həsən Haqverdiyev və Hüseyn Cəlilin əsərləri nümayiş etdirilib. Azərbaycan Respublikası Mədəniyyət Nazirliyinin dəstəyi ilə Eliyar Əlimirzəyev və Elçin Vəliyevin əsərləri də təqdim olunub.
Rəssamları yarmarkada incəsənət meneceri Aqnessa Tariverdiyeva təmsil edib. O, rəssamların yaradıcılığını Avropanın müxtəlif ölkələrindən olan kolleksiyaçılara, kuratorlara, qalereya nümayəndələrinə və incəsənət mütəxəssislərinə təqdim edərək yeni peşəkar əlaqələrin qurulmasına və gələcək beynəlxalq əməkdaşlıq imkanlarının yaranmasına töhfə verib.

Layihə Azərbaycandan olan gənc və tanınmış müasir rəssamların yaradıcılığını beynəlxalq auditoriyaya təqdim etmək, həmçinin onların Avropa müasir incəsənət mühitində tanınmasını gücləndirmək üçün mühüm imkan yaradıb.
Bu iştirak Azərbaycan müasir incəsənətinin beynəlxalq səviyyədə tanıdılmasına, yeni mədəni əlaqələrin qurulmasına və gələcək sərgi və əməkdaşlıq imkanlarının formalaşmasına töhfə verib.

Təqdimat Azərbaycan Respublikası Mədəniyyət Nazirliyinin dəstəyi ilə Atesh Hub və Fluxus Space-in əməkdaşlığı çərçivəsində həyata keçirilib.

Jale Aziz
qobelen və tekstil qarışıq media sənətçisidir. Təcrübəsində toxuculuq, tikmə və müxtəlif tekstil texnikalarından istifadə edərək köhnə parçaları ipə çevirir və yaddaş, zaman və şəxsiyyət mövzularını araşdırır. Qatlı səthlər, rəng keçidləri və ənənəvi motivlər vasitəsilə ənənə ilə müasir ifadə arasında dialoq yaradır. Əsərləri yerli və beynəlxalq sərgilərdə, o cümlədən Blazar-da nümayiş olunub. 

Emin Mathers
Konseptual Fotoqrafiya Sənətçisi, 1990-cı ildə Cənubi Qafqazın Xəzər sahilində doğulmuş, hazırda Berlində fəaliyyət göstərir. O, son yeddi il ərzində geniş və eksperimental yaradıcılıq praktikasına malik konseptual fotoqrafdır və xüsusilə monotiplər üzrə ixtisaslaşıb. Eyni zamanda sənədli layihələrdə iştirakı ilə seçilir; insan fəaliyyətlərini diqqətlə müşahidə edir və simvolik anları həssaslıqla qeydə alır. Şəxsi təcrübələrdən qaynaqlanan dərin düşüncələri əks etdirən konseptual fotoşəkilləri müxtəlif çap texnikaları və ekspozisiya dizaynı prosesindən keçir - hər mərhələ tamaşaçının təcrübəsini daha da zənginləşdirir. Yaradıcılığında Mathers müasir fenomenlərə özünəməxsus baxış təqdim edir və izləyicini reallığın dərinlikləri üzərində düşünməyə dəvət edir. Emin özünü kosmik həqiqəti insan dünyasına ötürən bir dirijor kimi təsvir edir; elm və mənəviyyatın balansını araşdıran vizual sənət vasitəsilə Dolça dövrünün ideyalarını ifadə edir. Qavrayışı genişləndirmək istəyi ilə onun fotoqrafiyaya bədii baxışı yaddaş, indiki ana meditasiv dalış və təxəyyülün qarşılıqlı təsiri üzərində qurulub. 

Fidan Nazim qız
2016-cı ildə Bakı Dövlət Universitetinin “Kitabxanaçılıq və İnformasiya” ixtisası üzrə həm bakalavr, həm də magistr dərəcəsini bitirmişdir. O, Light and Composition University-də Fotoqrafiyanın Əsasları üzrə diplom proqramında, eləcə də YARAT Müasir İncəsənət Məktəbində təhsil almışdır. Uzun illər kitabxanada çalışdıqdan sonra mühasibat sahəsində fəaliyyət göstərmiş, lakin son illərdə bütün diqqətini fotoqrafiyaya yönəltmişdir. Fotoqrafiya ilə bağlı suallarına cavabları çox vaxt yeraltı kitabxanalarda tapır. İllər sonra kitabxana mühitinin təsiri ilə əl işi foto-kitablar hazırlamağa başlamışdır. İstifadə etdiyi kağızların əksəriyyətini yeraltı kitabxanalardan və dostlarının istifadə olunmamış vərəqlərindən əldə edir. Onun yaradıcılığının əsas mövzuları sakitlik, qocalıq və hisslərdir. Eyni zamanda müxtəlif sosial problemləri əhatə edən layihələr üzərində də çalışır. 1843-cü ildən istifadə olunan alternativ “Cyanotype” üsulu ilə ev laboratoriyasında çap və tonlama işləri aparır. Hazırda Fieldeye Notes fotoqrafiya kollektivində redaktor və fotoqraf kimi fəaliyyət göstərir.